ЧР спорт министрӗн халӗ икӗ ҫум кӑна тӑрса юлнӑ. Ҫу уйӑхӗн 2-мӗшӗнче ЧР Элтеперӗ Олег Николаев Алексей Чернова ӗҫрен кӑларасси пирки хушу алӑ пуснӑ.
Алексей Чернов асӑннӑ ведомствӑра пӗлтӗрхи ҫурла уйӑхӗн 12-мӗшӗнчен ӗҫлеме пуҫланӑ. Унччен вӑл Шупашкарти 1-мӗш спорт шкулӗн директорӗн тивӗҫӗсене пурнӑҫланӑ.
Халӗ спорт министрӗн Василий Петровӑн икӗ ҫум юлнӑ: Татьяна Рябинина тата Ольга Смирнова.
Чӑваш Ен Элтеперӗ Олег Николаев Чӑваш чӗлхи кунӗпе тата чӑваш халӑхне ҫутта кӑларакан, хӑйӗн аслӑлӑхӗпе пире паян та тӗлӗнтерекен Иван Яковлевич Яковлев ҫуралнӑранпа 175 ҫул ҫитнӗ ятпа саламланӑ.
«Вӑл хӑйӗн педагогика тытӑмне йӗркеленӗ, вӗренӳ заведенийӗсем уҫнӑ, ҫынна юратма тата тӑван чӗлхене хисеплеме вӗрентнӗ. Унӑн пурнӑҫӗн ҫулӗ Тӑван ҫӗршыва тата хӑй халӑхне чунтан парӑнса ӗҫленине кӑтартакан ырӑ тӗслӗх пулса тӑрать.
Паян Чӑваш чӗлхи кунне Раҫҫейри чылай регионта анлӑн уявлаҫҫӗ, унта чӑваш халӑхӗн тӑван чӗлхине, йӑли-йӗркине тата культура хаклӑхӗсене сыхласа упрама пулӑшакан майсем пурнӑҫланаҫҫӗ», — тенӗ саламра.
Малашне ЧР Элтеперӗн ҫамрӑксен политики енӗпе ӗҫлекен управленийӗ пулӗ. Ҫавна май Олег Николаев ЧР Вӗренӳпе ҫамрӑксен политикин министерствин ятне улӑштарасси пирки хушу кӑларнӑ. Вӑл ЧР Вӗренӳ министерстви пулӗ.
Ҫавӑн пекех "Авангард" вӗренӳпе методика центрӗ, Ҫамрӑксен пуҫарӑвӗсен центрӗ ҫӗнӗ управление пӑхӑнӗҫ.
Хальлӗхе управление кам ертсе пырасси паллӑ мар.
Ҫулталӑк вӗҫлениччен республикӑра агромаркет уҫма палӑртнӑ. Кун пирки ЧР Элтеперӗ Олег Николаев пӗлтернӗ.
Унта фермерсен продукцине сутӗҫ. Кунашкал лавкка пирӗн патра хальччен пулман. Раҫҫейре те ҫук.
Агромаркетра фермерсем валли вырӑнсем пулӗҫ. Ҫитес вӑхӑтра лавккан дизайн тата суту-илӳ технологийӗн концепцине хатӗрлӗҫ.
Агромаркета хута яма республика хыснинчен 41 миллион тенкӗ уйӑрнӑ.
Шупашкарти В.И. Чапаев ячӗллӗ производство пӗрлешӗвӗн генеральнӑй директорне Михаил Резникова «Чӑваш Республикин тава тивӗҫлӗ изобретателӗ» ят панӑ. Хушӑва еспублка Элтеперӗ Олег Николаев ӗнер, ака уйӑхӗн 20-мӗшӗнче, алӑ пуснӑ.
2018 ҫулта Михаил Резников «Чӑваш Республики умӗнчи тава тивӗҫлӗ ӗҫсемшӗн» ордена тивӗҫнӗччӗ. Йышӑнӑва ун чухнехи Чӑваш Ен Элтеперӗ Михаил Игнатьев алӑ пуснӑччӗ.
Михаил Резников хӑй вӑхӑтӗнче республика Правительствинче те тӑрӑшнӑччӗ, унта вӑл вице-премьер пулчӗ, кайран транспорт министрӗнче тимлерӗ. Кайран каллех хӑйӗн унчченхи вырӑнне — Чапаев ячӗллӗ завода — куҫнӑччӗ.
Ҫӗрпӳ районӗнче пуш уйӑхӗн 16-мӗшӗнченпе карантин пулнӑ. Ку Кивӗ Тутайкасси ялӗнче икӗ ҫын вӑкӑр пуснӑ хыҫҫӑн Ҫӗпӗр мурӗпе чирленипе ҫыхӑннӑ. Вӗсене пушӑн 15-мӗшӗнче пульницӑна вырттарнӑ.
Карантин пӗр уйӑха тӑсӑлнӑ. Ӗнер ЧР Элтеперӗ Олег Николаев карантин вӗҫленни пирки хушу алӑ пуснӑ.
Ҫӗртме уйӑхӗн 1-мӗшӗнчен тин ҫуралнӑ ачасене тӗрӗллӗ парне пама пуҫлӗҫ. Ӑна 2023 ҫулхи кӑрлачӑн 1-мӗшӗ хыҫҫӑн ҫуралнӑ ачасем тивӗҫӗҫ. Парне йышӗнче мӗн пулӗ-ха? ЧР Элтеперӗ Олег Николаев ҫакна пӗлес тесе ыйтӑм ирттерет.
Виҫӗ вариант сӗннӗ. Пӗрремӗшӗ: пододеяльник, тӗрленӗ алшӑлли, простынь, юмахсен кӗнеки. Иккӗмӗшӗ: ача утиялӗ, тӗрӗллӗ кипке, ахаль кипке. Виҫҫӗмӗшӗ: капюшонлӑ алшӑлли, чӗрне касмалли хачӑ, погремушка, прорезыватель, ӗмкӗчлӗ бутылка.
Хальхи вӑхӑтра 1-мӗшӗшӗн ытларах сасӑ панӑ.
ЧР Элтеперӗ Олег Николаев "Чӑваш Республикин халӑх учителӗ" ята ҫирӗплетнӗ. Хушӑва пуш уйӑхӗн 31-мӗшӗнче алӑ пуснӑ.
Халӗ Министрсен Кабинечӗн саккун проектне хатӗрлемелле. Ун хыҫҫӑн "Чӑваш Республикинчи патшалӑх наградисем ҫинчен" саккуна улшӑнусем кӗртмелле. Унтан ӑна Патшалӑх Канашӗ пӑхса тухӗ.
Сӑмах май, хальхи вӑхӑтра "Чӑваш Республикинчи вӗренӳ тытӑмӗнчи тава тивӗҫлӗ ӗҫчен" тата "Чӑваш Республикин тава тивӗҫлӗ вӗрентекенӗ" хисеплӗ ятсем пур.
Паян Чӑваш Ен Элтеперӗ Олег Николаев «Контактра» халӑх тетелӗнчи «Чувашская Республика», «Олег Николаев/Чувашия» ушкӑнсенче тӳрӗ эфир ирттерессине Чӑваш халӑх сайчӗ пӗтернӗччӗ-ха. Аса илтерер: вӑл 11 сехетре пуҫланнӑ.
Анчах эфир вӑхӑтӗнче Интернет-ҫыхӑнура пӑтӑрмах сиксе тухнӑ. Уншӑн Олег Николаев Телеграмри хӑйӗн каналӗнче ҫынсенчен каҫару ыйтса ҫырнӑ май кӑлтӑк сӑтавне тишкерсе тивӗҫлӗ йышӑну тума шантарнӑ. Унсӑр пуҫне вӑл телеверсие паян Чӑваш Енӗн Наци телекуравӗн эфирӗнче 20 сехет те 30 минутра пӑхма сӗннӗ.
Ҫӗпӗр мурне пула Ҫӗрпӳ тата Сӗнтӗрвӑрри районӗсенче тискер чӗрчунсене тытассине чикӗленӗ. Ку хушӑва ЧР Элтеперӗ Олег Николаев пуш уйӑхӗн 29-мӗшӗнче алӑ пуснӑ.
Хушура палӑртнӑ тӑрӑх, чӗрчунсене тытассине ака уйӑхӗн 30-мӗшӗччен чикӗленӗ.
Ытларах чухне Ҫӗпӗр мурӗ чӗрнеллӗ чӗрчунсем чирлеҫҫӗ. Ҫапах хир сыснисем, тилӗсем, йӗкехӳресем инфекциленнине те палӑртнӑ.
+1.3 °C